Totus tuus - Górecki

Ég er búin að uppgötva nýjan tónsnilling.  Hann heitir Henryk Górecki og er pólskur.  Ég hef í spilaranum í bílnum mínum þetta lag Totus tuus sem ég setti inn á spilarann hérna á síðunni.  Mér finnst það vera mjög fallegt og vildi svo sannalega syngja það.  Meðsöngvarar óskast hér með þeir sem hafa áhuga vinsamega gefið ykkur fram.  Ég veit ekki til þess að tónlist þessa manns hafi hljómað mikið hér á klakanum en etv. er það bara vittleysa hjá mér?

Pavarotti allur

Þá er Pavarotti allur.  Ég hitti hann aldrei blessaðan frekar en hún Diddú okkar sem hefur sungið með hinum tveimur tenórunum úr fræga tenóró-tríóinu.

Hins vegar er ég svo fræg að hafa hitt Dómíngó sjálfan live.  Það var þannig að árið 1992 fórum við í heimsókn til kunningja okkar til Bayreuth í Þýskalandi.  Keith Reed var þá að syngja í óperukórnum í óperuhúsinu í Bayreuth og smyglaði okkur inn í húsið á barnapössum sem börnin hans voru með.  Mikið ævintýri.  Þarna spásseruðum við um á meðal starfsmanna óperunnar, og fræga fólksins sem við þekktum ekkert og Keith varð að benda okkur sérstaklega á.  Við smygluðum okkur inná upphitun hjá óperukórnum, sem var kominn í búning en kórinn er það allra flottasta hljóðfæri sem ég hef heyrt í, ég sat dolfallin í klukku allan upphitunina. 

Allavega þar sem ég er þarna backstage þá geng ég í flasið á manni sem mér fannst ég eitthvað kannast við - og brosti til hans náttúrulega sem sönnum Íslendingi ekki ætlaði ég að móðga manninn skyldi þetta vera hann Jón á Leiru eða Siggi á Bakka.  Maðurinn brosti til baka og spjallaði aðeins við dóttur mína sem var þarna með mér.  Síðan er kallað á hann og þá fattaði ég að þetta var sjálfur Meistró Placidó Dómingó sem var næsta kvöld að syngja í óperunni Parsifal sem ég held að Wagner hafi samið aðeins til flutnings í Bayreuth.  Við Dómíngó tókum nú ekki lagið saman þennan sumardag í fyrndinni í Þýskalandi en mér fannst maðurinn mjög alþýðlegur og sjarmerandi.  Og minni og grennri en ég hélt úr sjónvarpi og myndum. 

Ber ber ber - skagfirsk aðalbláber

Ég fékk aðalbláber úr Laxárdalnum í Skagafirði í gær.  Pabbi og mamma týndu þau í sólskini um daginn.  Samkvæmt Svönu frænku þá eru ber sem týnd eru í sólskini sætari og betri en ber týnd í rigningu eða skýjuðu veðri.  Svana frænka veit sínu viti varðandi mat og hún er fjölfróð um allt sem viðkemur berjum.  Bestu berin í heimi samkvæmt hennar bókum eru úr Þingeyjarsýslum.  Berin frá pabba og mömmu týnd í sólskini í Laxárdal í Skagafirði eru með því besta sem ég hef fengið.  Við borðuðum berin eins og sælgæti beint með engum sykri né rjóma.  Þetta var örugglega einn lítri sem þau komu með og hann var kláraður snarasta í gær.  Og þar sem eru svo mikil andoxunarefni í berjunum sem eru svo góð fyrir frumurnar í manni, sbr. sér færslu mína áður, þá finn ég núna í morgunsárið hvað mér líður vel í skrokknum.  Ég hef ekki rætt sérstaklega við stofnfrumuna mína eins og konan sem kom fram í sjónvarpinu í vetur, hef ekki reynt það reyndar, en ég núna finn ég bara hvað frumurnar mínar allar saman eru sprækar af þessu yndislega aðalbláberjaáti mínu í gær.

 Besta sælgæti í heiminum - íslensk aðalbláber týnd í sólskini.

  

Að hafa vit fyrir fólki

Þetta finnst mér áhugaverð lesning.  Það er þetta með að hvetja fólk til hins og þessa.  Þegar upp er staðið er síðan svarið alltaf, það var enginn sem neyddi þig til að gera hitt og þetta, þú gerðir það sjálfur. 

Bankar rukka börn um FIT-kostnað

Mér finnst þessi frétt og aðrar varðandi FIT kostnað sem bankar rukka athyglisverð.  Lög um tékka sem vitnað í sambandi við þennan FIT kostnað er í eru frá árinu 1933.  Það í sjálfu sér er athyglisvert að við alla þá breytingu á viðskiptaháttum sem orðið hefur frá árinu 1933 að þá standist þessi lög svona vel tímans tönn.    Auðvitað á fólk ekki að taka meira út af reikningum sínum en það hefur leyfi til.  En ætti það nokkuð að vera hægt?  Í þá gömlu daga þegar ávísanir voru notaðar þá var sjálfsagt hægt að hringja í bankana og athuga hvort innistæða væri fyrir þeirri ávísun sem menn höfðu í höndunum í hvert skipti.  En bankarnir hafa alltaf haft ákveðinn opnunartíma þannig að sú þjónusta hefur ekki verið allan sólahringinn.  Núna eru komin greiðslukort og ég var svo bláeygð að halda að þá væri ekki hægt að greiða með þeim ef eingin innistæða væri fyrir greiðslunni.  Og sú þjónusta væri opin allan sólahringinn.  

Bankarnir

Ég tók eftir því í viðtali um daginn við forstjóra Kaupþings banka að þegar hann var spurður um það hvort ekki væri svigrúm til að lækka vextina hér á Íslandi að hann svaraði því ekki en sagði að  bankinn ætlaði að borga meira í skatta.  

 

Alþingismennirnir mínir

Lýst er eftir alþingismönnunum mínum.  Þeir eru:

Ágúst Ólafur Ágústsson

Ásta Ragnheiður Jóhannesdóttir

Ásta Möller

Birgir Ármansson

Björn Bjarnason

Geir H. Haarde

Illugi Gunnarsson

Ingibjörg Sólrún Gísladóttir

Jón Magnússon

Kolbrún Halldórsdóttir 

 

Nokkuð varð vart við þá í vor en eftir að þingi var frestað þann 13. júní sl.  hefur lítið orðið vart við þá í kjördæminu.  Á vef Alþingis er þennan boðskap að finna:

ALÞINGI (134. löggjafarþingi) HEFUR VERIÐ FRESTAÐ FRÁ 13. JÚNÍ TIL SEPTEMBERLOKA.
Alþingi, 134. löggjafarþing, kom saman til fundar fimmtudaginn 31. maí 2007. Þinginu var frestað 13. júní. Þingfundir urðu tíu og stóðu í 41 klst.

Allt fyrir ástina

Allt fyrir ástina syngur Páll Óskar alltaf jafn bjartsýnn.  Palli söng einu sinni með Kvennakór Reykjavíkur svokallað léttprógramm sem við vorum með í Austurbæjarbíó.  Palli söng nokkur lög einn og síðan önnur með kórnum.  Það var mjög gaman að vinna með Páli Óskari, hann er mjög góður skemmtikraftur að mínu mati.  Tónleikarnir byrjuðu með þessu lagi   Palli og hljómsveitin voru uppá sviðinu og kórinn kom inn meðan lagið var flutt.  Palli alveg brilleraði í þessu lagi og átti síðan aðra  mjög góða spretti á tónleikunum.  Við fórum síðan með þessa tónleika til Vestmannaeyja og vorum með eina tónleika þar sem tókust mjög vel.  Daginn eftir var Evróvision dagurinn þannig að Páll Óskar fór beint heim á Hótel eftir tónleikana til að hlaða batteríin fyrir sitt bráðum heimsfræga Nasa evróvision partý. Ekkert eftirtónleikaskrall hjá Palla sem var synd, ég hefði svo sannalega viljað skemmta mér með honum í Vestmannaeyjum en það var ekki á allt kosið, tímasetningin var svona.  Allt fyrir ástina.

Ísland er landið

Veðrið hefur svo sannalega verið gott síðustu vikurnar hér á suðvesturhorninu.  Þýsk nágrannakona mín fór til Hamborgar og Berlínar í júní og dvaldi þar í þrjár vikur í kulda og trekki.  Síðan hún kom heim hefur sólin skinið á þessu landshorni en hún hefur ekki áður kynnst reykvísku sumari og sól.  I'm so happy, sagði hún um daginn við mig þegar ég fór að tala við hana þar sem hún sat í garðstól út á flöt.  Þetta góða veður í júní og það sem af er júlí hefur jákvæð áhrif á mann, það er á hreinu.

Sveppavíma og matarverð

Við tókum eftir því hjónin í gær að fréttir á stöð tvö í gærkvöldi hófust á þessari frétt um ungan mann sem stökk út um glugga á hótelherbergi í Amsterdamm í sveppavímu.  Seinna í þessum sama fréttatíma var síðan frétt um að við Íslendingar værum mestir og bestir í matarverði í Evrópu.  Í raun er sérkennilegt að ekki skuli vera látið meira með þessa frétt, yfirleitt erum vér Íslendingar mjög ánægð ef við erum mest og best í einhverju miðað við höfðatölu og allt það.  Þess vegna finnst mér að þessi frétt um Evrópumet okkar Íslendinga ekki fá þann sess sem hún ætti að fá.