Vorjafndægur

og lóan bara mætt til Hornafjarðar.  Það er ágætis sautjándijúní veður úti og maður verður skemmtilega bjartsýnn á að vorið sé að koma.  Það er gallinn á mars þetta með að það geta komið svona góðir dagar og maður verður glaður innanumsig og heldur að veturinn sé eitthvað að láta undan.  Veturinn er náttúrulega að láta undan en það geta komið kaldir og leiðinlegir dagar enn þá og páskahret og hvað veit ég.  En það er ágætt að njóta þessarar marssælu þegar hún gefst og muna bara að fara ekki í vont skap þegar hvessir og kólnar á nýjan leik.

 Ég horfði á Jon Stewart í the Daily show á norska sjónvarpinu í gær.  Þetta var þátturinn þar sem hann fékk Cramer fjármálasnillinginn og ráðgjafann úr Mad Money í heimsókn.  Linkur á samtalið er hérna.  Mér fannst sannast að segja óþægilegt að sjá Cramer engjast eins og maðkur á öngli í þættinum þegar hann var að reyna að finna einhver svör við beittum spurningum og athugasemdurm Jons.  Lokaorðin í þættinum voru reyndar með þeim betri en þá segir Jon Stewart við áhorfendur - Trúið mér, það var jafn óþæginlegt að taka þetta viðtal við Cramer eins og það var að horfa á viðtalið.   Mæli með því að menn skoði þessi samskipti þeirra. 

Uppgjörið

Ég hef ákveðið að halda mig við það að gera uppgjör á gamla árinu í upphafi nýs árs hér á þessu bloggi mínu.  Árið 2008 verður að mörgu leyti mjög minnisstætt öllum Íslendingum en hér ætla ég að nefna nokkur atriði sem eru mér minnistæðust.

Andlát.  Við fjölskyldan misstum elskulegan tengdaföður minn Sigurjón Sigurðsson í byrjun janúar.  Elínborg Gunnarsdótir tengdamóðir mín er ótrúlega dugleg og seig að mínu mati að takast á við þær breyttu aðstæður sem urðu á hennar lífi við andlát Sigurjóns.  Núna hefur hún fengið herbergi inná Dalbæ á Dalvík, er búin að mublera það upp og getur búið þar eða skroppið yfir á Læk ef hún fær far til þess og veður og færð hentar.   Ég ætla aðeins að nefna fráfall Sigurjóns hér í þessu uppgjöri en ég fór á mun fleiri jarðafarir á árinu 2008 en önnur ár.

Tónleikar.  Ég fór á mjög marga tónleika þetta ár. Suma fór ég á óvænt og með stuttum fyrirvara eins og tónleikarnir með James Blunt, en hann kom mér á óvart, ég hafði gaman af þeim tónleikum.  Aðrir voru skipulagðir með löngum fyrirvara eins og ferð okkar fjölskyldunnar á Bræðsluna á Borgarfjörð eystri í sumar.  Þar var Damien Rice og meðan hann var að spila var alltaf öðru hvoru einhver sem kallaði og kallaði, spilaðu Blowers daughter, Damien tók síðan lagið í lokauppklappinu og mér fannst það eftiráaðhyggja ein af betri tónlistarmómentum hjá mér á árinu.  Ég dreif mig síðan í kórinn Vox academica og við fluttum ásamt 60 manna hljómsveit Carminu Burana í nóvember.  Tónleikarnir tókust mjög vel að okkar mati og Gunnar maðurinn minn sat aftast fyrir miðju í Grafarvogskirkju og hann var mjög ánægður með hljómsveit og kór.  En þeir tónleikagestir sem sátu fremst í kirkjunni, næst hljómsveitinni og kórnum voru ekki jafn heppnir því uppstilling á hljómsveitinni gerði það að verkum að hjómsveitin varð of sterk hjá þeim miðað við kórinn.  En við í kórnum vorum allsendis óvitandi um þetta og mér fannst allavega mjög gaman að flytja verkið.  Sérstaklega í lokin þegar O fortuna er tekið aftur, það var toppurinn hjá mér í tónleikaupplifun ársins.

Ferðalög.  Við ferðuðumst mjög mikið um Ísland á síðasta ári, vorum í gamla góða tjaldinu okkar og höfðum það fínt.  Einnig leigðum við tvisvar íbúðir á Akureyri hjá starfsmannafélögum sem við erum í hjónin, það kom mjög vel út.  Ísland var fallegt í sumar, við vorum mjög heppin með veður á þessum ferðum okkar, veðrið á Austurlandi var eins og á Spáni þegar við vorum þar á ferð.  Við keyrðum í einu striki frá Borgarfirði eystra, yfir Hellisheiði eystri yfir í Vopnafjörð og heimsóttum þar ættingja Gunnars, síðan var stefnan tekin á Akureyri.  Við vorum við Mývatn um 10 leytið um kvöldið, krakkarnir fengu sér hamborgara en við sátum í bílnum og dáðumst að frábæru veðri og fegurð Mývatns og nágrennis.  Síðan brunuðum við meðfram vatninu og sólin speglaðist þvílíkt í Mývatni og Mývatn og umhverfi var eins og póstkort af sjálfu sér og allst staðar voru rútufarmarnir af útlendingunum sem stóðu og mynduðu hver sem betur gat en við Íslendingarnir brunuðum í bílnum eins og eldibrandar beinustu leið í náttstað til Akureyrar.  Við sáum náttúrulega út um gluggann hvað þetta var fallegt það er ekki spurningin.

Vantraust.  Að lokum er það þá vantraustið.  Ég verð að játa að ég hafði haft nokkrar áhyggjur af efnahagsmálum þjóðarinnar.  Fyrir rúmu ári síðan hitti ég fólk sem hafði starfað innan veggja bankanna og þegar við kvöddumst þá kvaddi fólkið með þessum orðum:,, Vonandi tekst þeim að leysa efnahagsmál þjóðarinnar á farsælan hátt."  Við þessi orð þessara fyrrverandi bankamanna þá hugsaði ég - Vá þau hafa virkilegar áhyggjur af stöðu efnahagsmála á Íslandi.  Þetta var í september árið 2007.  Síðan hrundi litla Ísland í október 2008 og það virðist ekki hafa verið neinum sérstökum að kenna, enginn átti að passa uppá okkur litlu þjóðina á þessu skeri sem nú er sokkið í sæ.  Ég er seinþreytt til vandræða og frekar lengi að fatta hlutina, verð að játa það.  En þessi staða okkar núna er rosaleg og í raun óásættanleg.   Allir ráðamenn þjóðarinnar, stjórnmálaflokkarnir, forsvarsmenn atvinnulífs og forustusauðir þjóðarinnar allir sem einn áttu að grípa til varna fyrir land og þjóð fyrir löngu, löngu síðan.  Fyrst fyrrverandi bankamenn sáu þetta fyrir í september 2007 hvernig í ósköpum gátu ráðamenn þjóðarinnar sofið á verðinum fram í september 2008 þegar varð að steypa þjóðina í glötun?  Hvar var allt þetta fólk sem áttu að passa uppá land og þjóð?  Það brást algjörlega trausti þjóðarinnar og ég er ekki að sjá það að ég persónulega eigi eftir að treysta einum einasta af þessu fólki nokkurn tímann aftur.  Því miður.   

Gleðilegt nýtt ár

Ég tók þessa mynd af vetrarsólstöðusólinni okkar þann 21. des. sl. Það er ekki algengt að sólin láti sjá sig þann dag.  Svo er heldur ekki algengt að ég sé heima hjá mér og nái að taka mynd af blessaðri sólinni ef hún lætur sjá sig á þessum stysta sólargangsdegi sínum.  En þann 21. desember 2008 gékk þetta upp. 

 

 

Gleðileg jól

Nu er det jul igen, það má svo sannalega segja að það eru orð að sönnu.  Jólin eru alveg að koma enn og aftur og óska ég öllum gleðilegra jóla og farsældar á nýju ári -

Ég ætlaði að setja hér beint inn youtube - tengil á Jussi Björling og frábæran flutning hans á laginu Ó helga nótt en það er ekki hægt en hér má hlusta á flutninginn.

 O helga natt, lag Aldolphe Adam 1847

O helga natt, o helga stund för världen,
då gudamänskan till jorden steg ned!
För att försona världens brott och synder,
för oss han dödens smärta led.
Och hoppets stråle går igenom världen,
och ljuset skimrar över land och hav.

Folk, fall nu neder, och hälsa glatt din frihet.
|: O helga natt, du frälsning åt oss gav. :|

Ty frälsar'n krossat våra tunga bojor
Vår jord är fri, himlen öppen nu är
Uti din slav du ser en älskad broder,
och se, din ovän blir dig kär
Från himlen bragte frälsaren oss friden,
för oss han nedsteg i sin stilla grav.

Folk, fall nu neder, och hälsa glatt din frihet.
|: O helga natt, du frälsning åt oss gav. :

 

 Íslensk þýðing á laginu Ó helga nótt

Lag: Adolphe Adam Ljóð: Kristín Stætter 

Ó, helga nótt, þín stjarna blikar blíða
þá barnið Jesús fæddist hér á jörð.

Í dauða myrkrum daprar þjóðir stríða
uns drottinn birtist sinni barna hjörð.
Nú glæstar vonir gleðja hrjáðar þjóðir
því guðlegt ljós af háum himni skín.
Föllum á kné, nú fagna himins englar
frá barnsins jötu blessun streymir
Blítt og hljótt til þín
Ó, helga nótt, ó, heilaga nótt.

Vort trúar ljós það veginn okkur vísi
hjá vöggu hans við stöndum hrærð og klökk

Og kyrrlát stjarna kvöldsins öllum lýsi
er koma vilja hér í bæn og þökk.
Nú konungurinn Kristur drottinn fæddist
hann kallar oss í bróður bæn til sín.
Föllum á kné, nú fagna himins englar
hjá lágum stalli í lífsins kyndill
ljóma fagur skín
Ó, helga nótt, ó heilaga, nótt.

 

 

Vetrarsólstöður

Í dag eru vetrarstólstöður.  Eftir vetrarsólstöður fer sól að hækka aftur á himninum hér á norðurhveli jarðar.  Mér finnst þetta vera merkilegur dagur og finnst alltaf gott að vita til þess að nú fari sól hækkandi á lofti.  Ég gúglaði vetrarsólstöður og komst þá að því á þessu bloggi á árið 2009 eru 400 ár síðan Gallileo Gallílei notaði sjónauka til að skoða himnahvelfinguna og til þess að marka þessi tímamót er árið 2009 alþjóðlegt ár stjörnufræðinnar.  Ég hef áhuga á himingeimnum og hef einu sinni farið í stjörnusjónaukann sem er í Háskóla Íslands og skoðað stjörnurnar með honum.  Það var alveg magnað, sérstaklega að skoða fjarlægjar stjörnuþokur.  Ég væri alveg til í að gera svoleiðis aftur.

Í dag á Rás 1 verður útvarpað frá  jólatónleikadegi evrópskra útvarpsstöðva og er Sinfóníuhljómsveit Íslands klukkan eitt í dag og ætlar að spila tónlist eftir Bach og Handel.  Ég fór og hlustaði á hljómsveitina spila Síbelíus á einum af boðstónleikum hennar þegar Japanarnir vildu ekki fá þau í heimsókn eftir að við Íslendingar urðu alræmdir og úthrópuð sem pakk og fjárglæframenn erlendis.  Kannski skiljanlegt að engir vilji fá slíkt vandræðafólk í heimsókn til sín hvað þá að láta fólk vera að borga inná tónleika til að hlusta á slíkt lið vera að flytja tónlist en ég mæli með Sinfóníuhljómsveit Íslands það er góð hljómsveit og frábært tónlistarfólk og ég mæli einnig með útvarpi Rásar 1 í dag.  Þar verður flutt góð tónlist hver sem alþjóðlegur orðstír þjóðanna er.

Fjárlög

Ég skil vel þingimennina okkar, þ.e. þeir sem eru í minnihluta sem eru að múðra varðandi afgreiðslu meirihlutans á fjárlagafrumvarpi næsta árs.  Minnihlutanum finnst vanta upplýsingar en þingmenn meirihlutans virðast vita eitthvað meira um málið  allavega virðast þeir tilbúnir til að afgreiða fjárlagafrumvarpið með áorðnum breytingum.  Ég fór í rannsóknarleiðangur um heima internetsins og fann þennan fróðleik um frumvarp til fjárlaga sem nú verður að afgreiða fyrir áramótin.

1.  Framlagt fjárlagafrumvarp: m.kr.

Fyrri tala, Rekstrargurnnur, seinni tala sjóðshreyfingar                                 

Skatttekjur ............................................ 399.762,9             386.843,0

Skattar á tekjur einstaklinga .................... 111.000,0              107.800,0

Skattar á tekjur lögaðila ......................... 27.200,0                   26.000,0

Tryggingagjöld............................................ 42.032,8               41.451,1

Eignarskattar .............................................. 8.449,0                 8.299,0

Virðisaukaskattur ..................................... 145.100,0             137.800,0

Aðrir skattar á vörur og þjónustu ................... 58.327,2            57.967,1

Skattar ótaldir annars staðar ............................ 7.653,9            7.525,8

Aðrar rekstrartekjur............................... 45.920,8                 45.401,7

Arðgreiðslur ................................................. 2.130,0                    2.130,0

Vaxtatekjur og eignatekjur........................... 33.457,7              32.937,7

Rekstrartekjur ótaldar annars staðar............ 10.333,1              10.334,0

Sala eigna................................................. 3.300,0                 4.800,0

Fjárframlög............................................... 1.486,3                  1.485,3

Tekjur alls ............................................ 450.470,0             438.530,0

Æðsta stjórn ríkisins ............................................... 3.664,6                  3.664,6

Forsætisráðuneyti .................................................. 2.306,1                  2.306,1

Menntamálaráðuneyti.......................................... 61.809,3                   61.809,3

Utanríkisráðuneyti ................................................ 11.428,1                 11.428,1

Sjávarútvegs- og landbúnaðarráðuneyti ................. 17.783,9               17.856,9

Dóms- og kirkjumálaráðuneyti................................. 27.187,6               27.187,6

Félags- og tryggingamálaráðuneyti ............................ 102.480,9      100.760,9

Heilbrigðisráðuneyti................................................ 119.371,4             119.371,4

Fjármálaráðuneyti................................................... 52.969,8               44.939,8

Samgönguráðuneyti................................................ 57.316,2               57.241,2

Iðnaðarráðuneyti...................................................... 6.480,2                 6.480,2

Viðskiptaráðuneyti .................................................. 2.729,3                   2.729,3

Umhverfisráðuneyti................................................. 7.217,0                    7.217,0

Vaxtagjöld ríkissjóðs............................................. 34.670,0                  28.500,0

Samtals ...................................................... 507.414,4                491.492,4

Tekjujöfnuður.............................................. -56.94

Meirihluti fjárlaganefndar hefur síðan skilað nefndaráliti þar sem m.a. eftirfarandi kemur fram:

Í endurskoðaðri tekjuáætlun efnahagsskrifstofu fjármálaráðuneytis er gert ráð fyrir að tekjur verði 395,8 milljarðar kr. sem er 54,6 milljarða kr. lækkun frá frumvarpinu. Tekjujöfnuður verður -93,1 milljarður kr. sem er hækkun um -36,2 milljarða kr.

  Svo mörg voru þau orð.  Ekki eitt einasta orð um það hvar tekjurnar lækka, né hvernig þessi tala um tekjuójöfnuð er fundinn út.  Mér finnst það mjög einkennilegt ef ekki eru settar fram áætlaðar tölur í breyttu frumvarpi sem sýna hvar og hvernig tekjurnar lækka svo síðan hvar og hvernig nýr tekjuójöfnuður er fundinn út. Þannig virðist ekki öll spilin upp á borðinu í þessum upplýsingum sem eru aðgengileg okkur almenningi varðandi frumvarp til fjárlaga næsta árs.  Enda kemur það okkur kannski bara ekkert við?  Þetta er kannski bara mál sem kjörnir fulltrúar okkar eiga að stella með en hlutdeild okkar almennings er að taka afleiðingunum.  Þannig skiptir það engu máli hvort við almenningur eða þeir á Alþingi geti sett sig inní þær forsendur sem þar er unnið eftir.  En það er klárt að það koma margar eftiráútskýringar það verður engin vöntun á því.  Ég vildi bara óska að menn skýrðu betur út hvað þeir væru að gera áður en ákvörðun er tekin.  Kæri mig minna um þessar útþvældu eftiráskýringar. 

 

 

Kosningafyrirkomulagið

Mér finnst nauðsynlegt að skipta um kosningafyrirkomulag hér á landi.  Flokkafyrirkomulagið hér á landi svo og það fyrirkomulag að flokkarnir gangi óbundnir til kosninga gerir það að verkum að það skiptir engu máli hverju flokkarnir eru að lofa kjósendum fyrir kosningar. Um leið og búið er að loka kjörstöðum er einnig lokað á allt minni kjörna fulltrúa og flokkarnir ganga til sinna einkadagskrár þar sem þeirra eigin hagsmunir eru hafðir í húfi en ekki kjósenda. Þannig kemst maður að því ,,the hard way" að maður hefur látið plata sig æ ofaní æ og kosið fólk sem maður trúið að talaði af heilindum en sér að svo var ekki heldur var aðeins um innantómt málskrúð að ræða.

Ég vil sjá kosningafyrirkomulag þar sem hægt er að velja bæði fólk og flokka.  Ég hef ekki kynnt mér nægjanlega vel hugmyndir Vilmundar Gylfasonar heitins en það gæti vel verið að þar væri á ferð hugmynd sem væri nýtanleg fyrir land og þjóð.  Ef við á Íslandi ætlum að þykjast vera lýðræðisþjóð þá verður eitthvað mikið að gerast í kosningafyrirkomulaginu því núverandi fyrirkomulag er vonlaust á mínu mati og ýtir undir spillingu. 

Þannig hélt ég til dæmis að ég væri að kjósa jafnaðarmannaflokk á þing í síðustu kosningum en sé það núna að svo var ekki heldur einhverskonar sjálfstæðisframsóknarflokk. Ég var ekkert mjög ánægð með það val sem ég hafði sem kjósandi í síðustu alþingiskosningum og atkvæðið mitt fór á illskásta flokkinn, ég verð að játa það.  Mér finnst það núna mjög leitt að hafa lagt mitt atkvæði á vogaskálarnar til að koma þessum flokki til valda en kenni bara sjálfri mér um að að hafa verið svona vittlaus að hafa ekki séð í gegnum orðskrúð þessara þykistu jafnaðarmanna.  Ég set þær kröfur að ég þurfi ekki að vera að velja eitthvað illskárst.  Ég vil fá að greiða atkvæði mitt fólki og flokk sem ég hef trú á að ætli sér að gera það sem þau tala um fyrir kjördag ef og þegar þau ná kosningu.  Annars er bara betra að skila auðu.  Hreinlega vera ekkert að gefa atkvæðið sitt í þetta leikrit sem verið er að bjóða manni uppá.

Catch 22

Ég hef lýst þeirri skoðun minni að mér finnist vafasamt að Ísland taki einhverja milljarðatugi að láni erlendis frá til að koma fótum undir krónuna.  Ég verð að játa að ég er smeyk um það að þeir gjaldeyrismilljarðatugir streymi aðeins óhindrað burt frá litla Íslandi í hendur þeirra afla sem hafa komið okkur óhindrað í þessa stöðu.  Og skiji þar með okkur eftir í enn meiri skuldasúpu en fyrir er og er ekki á það ástand bætandi.  Ég held að yfirvöld verið að skýra með greinagóðum hætti með hvaða hætti þau ætla að forða landinu frá slíkum örlögum.  Verður það alveg gegnsætt hvernig þessum lánspeningum verður varið?  Hingað til hefur ekki nokkurn skapaður hlutur verið gegnsær í þessari efnahagskreppu og ég er ekki of bjarsýn á það að yfirvöld telji nokkra ástæðu til þess að skipta um gír.  Það verða notaðir áfram einhverjir frasar um trúnað og bankaleynd og ég veit ekki hvað og hvað.  Við, lántakendurnir og lánagreiðendurnir fáum ekki að vita til hvers við tókum þessi risalán, né hverjir eiga eftir að fá þau afhent.  Ég er allavega dálítið smeyk um að svo verði.

En kannski þarf ég ekkert að hafa neinar áhyggjur af þessum risalánum.  Nú virðumst við Íslendingar vera komin í einhverskonar catch 22 stöðu.  Við fáum ekki lán frá IMF nema búið sé að ganga frá viðbótarlánum frá öðrum löndum.  Svíar vilja ekki lána okkur nema búið sé að ganga frá málum hjá IMf.  Þannig bendir hver á annan.

Sannleikurinn er sagna bestur

Ég fann þetta myndband á youtube sem sýnir stemninguna sem var á Austurvelli í gær og þá sérstaklega við Alþingishúsið.  Ég var hinum megin á Austurvellinum og gerði mér ekki grein fyrir þeim hluta mótmælanna sem fram fór þar fram nema flöggun Bónusfánans. Finnst að mörgu leyti að of mikið sé hampað ólátum í umfjöllun um mótmælin.  

Það vantar aðeins á þetta myndband að það heyrist í ræðumönnum og þeirra boðskapur.  Hins vegar sést vel þarna unga fólkið sem var töluvert af í gær sem kom mér dálitið á óvart.  Unga fólkið okkar er bæði reitt og biturt.  Það getur vel verið að reiði sé ekki til alls góð.  En fólk er eki bara reitt heldur einnig vonsvikið. Vonsvikið yfir því að allir þeir sem hafa valist til þess að halda uppi merki landsins og verja það áföllum hafa brugðist.  

Lán og lán

Eitthvað virðist lánið vera valt hjá okkur Íslendingum þessa dagana.  Allavega liggur IMF lánið ekki á lausu fyrir okkur svo mikið er víst.  Ég er mjög hugsi yfir öllum þessum lánum sem mér er sagt að ég verði að taka.  Af hverju þarf ég að taka öllu þessi lán?  Mér finnst það engan veginn skýrt, það er bara hamrað og hamrað á því að við verðum að fá lán og þurfum að fá lán.  Upphæðirnar eru mjög óljósar, þar finnst mér vera skákað í því skjólinu að gengi íslensku krónunnar sé óljóst.  Það er talað um lán í dollurum og evrum og ég veit ekki hvað og hvað.  Hundruðir milljarða hér og hundruðir milljarðar þar.  Um þessi lán er fjallað eins og það sé engin spurning að við þurfum þessi lán.  Enn spyr ég - til hvers erum við að taka þessi lán? Hverjar eru upphæðirnar í íslenskum krónum, hvaða vaxtakjör eru lánin á, til hve langan tíma og hverjar verða árlegar afborgarnir lánanna í íslenskum krónum?  Eru þessar upplýsingar allar eitt allsherjar hernaðarleyndarmál?  

Þar sem ég sem Íslendingur er að taka þessi lán þá er það lágmarkskrafa að útskýrt sé fyrir mér með skiljanlegum hætti af hverju ég sé að taka lánin og hvernig ég skuli greiða þau til baka.  Ef á að halda áfram með óljósar yfirlýsingar um þörf á lántöku minni án þess að ég fái á nokkurn hátt botn í það af hverju þá vil ég ekkert taka þessi lán.  Og ef einhver ætlar að taka lán núna út fyrir hina íslensku þjóð og þar með mína kennitölu án þess að ég fái á nokkurn hátt ráðið við það, né skilið af hverju, né fengið upplýsingar um það á neinn hátt finnst mér það mjög vafasöm aðgerð svo ekki sé meira sagt.